Qarabağ Azərbaycandır ! | Karabakh is Azerbaijan ! | Карабах - это Азербайджан !

Çağrı Mərkəzi

“e-Agro”

Elektron Kənd Təsərrüfatı İnformasiya Sisteminin (EKTİS) yaradılması ölkəmizdə aqrar sahənin inkişaf və aqrar xidmətlərin elektronlaşdırılması istiqamətində atılan mühüm addımlardan biridir. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzi (EHİM) tərəfindən texniki olaraq ərsəyə gətirilən EKTİS-də kənd təsərrüfatı proseslərinin düzgün həyata keçirilməsi və inkişafını təmin etmək üçün nəzarət mexanizmləri qurulur, real vaxt rejimində proseslərin izlənilməsi imkanları yaradılır. Əsas fəaliyyət prinsipləri:

• Fermerlərə yaxınlığın təmin olunması;

• Şəffaf və səmərəli idarəetmənin təşkili;

• İnnovasiyaların tətbiqi.

EKTİS-in məqsədləri:

• Fermerlər və onların istifadə etdikləri resurslar haqqında vahid məlumat bazasının yaradılması;

• Dövlət büdcəsi hesabına subsidiyaların verilməsi sahəsində şəffaflığın artırılması;

• Subsidiyaların verilməsi mexanizminin təkmilləşdirilməsi;

• Kənd Təsərrüfatı Nazirliyi üçün proqnozlaşdırma, koordinasiya və nəzarət imkanlarının təmin edilməsi.

EKTİS-in istifadəsi

Vətəndaşlar həm veb-portal, həm də mobil tətbiq vasitəsilə EKTİS-dən istifadə edə bilərlər.

• Veb-Portal- https://www.eagro.az/ ;

• Mobil tətbiq - eAgro (həm Android, həm də iOS versiyaları mövcuddur).

EKTİS-ə qeydiyyat proseduru «ASAN Login» Vahid Giriş Sistemi üzərindən yerinə yetirilir: 

• Fiziki şəxslər (fərdi fermerlər) EKTİS-də FİN-lə qeydiyyatdan keçirlər;

• Hüquqi şəxslər EKTİS-də daxil olmaq üçün “Asan İmza” (Mobil imza) və ya "Elektron İmza”dan (E-imza) istifadə edirlər.

EKTİS - şəxsi kabinet 

Qeydiyyat proseduru uğurla tamamlandıqdan sonra, istifadəçi sistemin giriş səhifəsində «Fermer» bölməsini seçir və şəxsi kabinetə daxil olur. Burada aqrar sahədə fəaliyyət barədə məlumatlar qeyd edilir.

Əsas səhifə əsasən kartlardan ibarətdir. Hər bir kart, tətbiqin fərqli modul və funksionallığını əks etdirir. Kartların sayı hər bir istifadəçinin roluna, şəxsi məlumatlarına uyğun olaraq dəyişkənlik təşkil edir.

EKTİS - modullar

EKTİS-də olan modullar aşağıdakı funksionallıqlara malikdir:

• Təsərrüfatlarım modulunda rayonlar üzrə ərazilər yaratmaq mümkündür.(məs., kənd və ya qəsəbəyə uyğun). Ərazilərdə torpaq sahələrini yaratmaq və lazımi torpaq sənədlərini əlavə etmək, bitkiçilik - əkin bəyanı (yəni əkilən bitkilər) barədə məlumatları daxil etmək və mövcud istixanaları göstərmək, fəaliyyət aparılan yeri xəritədə işarələmək mümkündür. Heyvanlarım bölməsində isə İribuynuzlu, Arıxana, Baramaçılıq barədə məlumatlar daxil edilir;

• Planlarım modulunda fermer tərəfindən növbəti illərdə planlanan əkin məlumatları, məhsuldarlıqla bağlı proqnoz göstəriciləri daxil edilir;

• Xidmətlər və şikayətlər modulunda fermerlər mövcud problemləri üzrə müraciət edir və bu müraciət Nazirliyin müvafiq əməkdaşları tərəfindən operativ cavablandırılır;

• Tənzimləmələrim modulunda istifadəçiyə dair şəxsi məlumatlar yerləşdirilir;

• Qayda və təlimatlar modulunda subsidiya verilməsi barədə qayda və təlimatlar, həmçinin subsidiya kalkulyatoru mövcuddur;

• Subsidiya modulunda subsidiyalar üzrə müraciət etmək mümkündür.

EKTİS istifadəçiləri

Sistemin təqdimatı 14 fevral 2019-cu il tarixində baş tutub. İstifadəyə verildiyi ilk həftə ərzində, yəni 2019-cu ilin 17-22 fevral tarixlərində EKTİS-də Quba rayonu üzrə qeydiyyatdan keçən fermerlərin sayı 167 nəfər təşkil edib. Hal-hazırda isə portalda 600 mindən artıq fermer qeydiyyatdan keçib. 

EKTİS-də həm fermerlər, həm də onlara xidmət göstərən toxum, ting, gübrə, pestisid təchizatçıları, tədarükçülər, süni mayalanma mütəxəssisləri, baytarlar qeydiyyatdan keçirlər. Qeydiyyatdan keçən istifadəçilər təklif etdikləri məhsul və xidmətlər haqqında sistemdə məlumatlar yerləşdirir.

EKTİS – Subsidiyalar

Azərbaycan Respublikası Prezidentinin müvafiq Fərmanı ilə təsdiqlənən “Kənd təsərrüfatı məhsulları istehsalının subsidiyalaşdırılması Qaydası”na əsasən 2020-ci ildən etibarən fermerlərin subsidiyalara müraciəti və onlara bu sahədə göstərilən xidmətlər EKTİS vasitəsilə onlayn qaydada həyata keçirilir.

Bitkiçilik sahəsi üzrə:

• Əkin subsidiyası;

• Məhsul subsidiyası;

• Toxum və ting subsidiyası;

Heyvandarlıq sahəsi üzrə:

• Heyvan subsidiyası (iribuynuzlu heyvanların süni mayalandırılması);

• Arıçı subsidiyası;

• Barama subsidiyası;

EKTİS-in fəaliyyət rejimi: EKTİS 24/7 rejimində fəaliyyət göstərir. Sistemdə aparılacaq təmir və yenilənmə işləri haqqında qabaqcadan istifadəçilərin məlumatlandırılması təmin edilir. Fəaliyyətində hər hansı bir texniki problemlərə görə dayanmalar qısa vaxt ərzində aradan qaldırılır.

Sistemdən istifadə ilə bağlı ətraflı məlumat üçün Azərbaycan Respublikasının Kənd Təsərrüfatı Nazirliyinin 1652 Çağrı Mərkəzi ilə əlaqə saxlaya bilərsiniz.